نظام اليوم الدراسي والفسحة

ونعود الى نظامنا المدرسى وكان اليوم الدراسى مكونا من سبعة حصص ماعدا يوم الخميس فقد كان خمسة حصص فقط والحصة مدتها خمسة وأربعون دقيقة ونأخذ فى الفترة الصباحية ثلاثة حصص متتالية يفصل بينها خمس دقائق ثم

الفسحة الصغيرة

ومدتها ربع ساعة ننزل فيها الى الفناء لتناول السندوتشات والاسباتس وهى مشروب غازى قريب من السفن آب الحالى وكان ثمن الزجاجة نصف قرش صاغ وكنا نسميه تعريفة وكانت تباع ومعها الحلوى والملبن والعسلية فى

المقصف

وهو عبارة عن كشك أنيق من الخشب تحيط به الزهور ويعمل برأس مال عبارة عن أسهم من التلاميذ قدر السهم خمسة قروش صاغ وتوزع أرباحه على المساهمين فى نهاية العام الدراسى ويشرف عليه مدرس الفلاحة ويعمل فيه تلميذ ينزل من فصله قبل الفسحة بقليل ليفتحه وكان نظيفا ويحضر مدرس الفلاحة السعدنى أفندى البضائع من أرقى المصانع ويمر عليه مندوب من الصحة المدرسية وكان يصنع لنا المربى والشربات فى حصة الفلاحة ويعرضها للبيع فى الكانتين وكانت والدتى تشجعنى على شراء بعض منها أحضرها معى وكان الكانتين يكسب جيداا حيث كنت أسترد العشرون سهما وقيمتهم الشرائية جنيها واحدا جنيها ن أو أزيد قليلا وكان مسار سعادة من أمى لأنها عادة ماتكون هى صاحبة الجنيه الأصلى ونعود لنأخذ حصتان الرابعة والخامسة ويعقبهم

فسحة الغذاء أو الفسحة الكبيرة

ومدتها ساعة وربع وننزل فيها أولا الى مطعم المدرسة بالدور النصف بدروم فى صفوف منظمة لتناول الغذاء الذى تقدمه لنا المدرسة ويتكون من خضار مطبوخ وأرز ولحم وسلاطة خضراء وخبز وكل ذلك يقدم ساخنا ومعدا فى مطبخ المدرسة

والى لقاء مع طريقة التقديم ونظام المطعم

ذكريات مع اليوم الدراسي

وعودة الى يومنا الدراسى

الذى يبدأ من نزولى من الحنطور قافزا من جوار عم مجاهد متمما على هندامى عادلا لطربوشى واضعا مخلتى وهى عبارة عن حقيبة من القماش تعلق فى الكتف لها جيبان الاكبر للكتب والكراريس و الاصغر للاقلام والاستيكة ولا مانع لوضع لفة السندوتشات بدلا من مسكها منفصلة وكنا نرتدى زيا مكون من حذاء اسود برباط ذو خمسة عراوى وجورب يعلو حتى اسفل الركبة بقليل رصاصى اللون وبنطلون قصير يحازى اعلى الجورب تقريبا وقميص سماوى مقفول بزراير حتى الرقبة تعلوه جاكتة من نفس صوف ولون البنطلون الكحلى الغامق وبجرد دخولى من باب المدرسة اخرج من حقيبتى شارة الالفة وأربطها على زراعى الايسر وكانت تعطى للتلاميذ المتفوقين حيث كنا نساعد المدرسين فى بعض الاعمال التنظيمية فى فصولنا . ثم أنخرط فى وسط زملائى نكون جماعات فى دوائر صغيرة نلقى على بعض تحية الصباح ونتبادل الحديث الذى دائما ما يكون حول الواجب المدرسى أو ما سوف نتبادله من الحلوى مع بعضنا فى الفسحة الصغيرة ويدق جرس طابور الصباح وله نظام محفوظ لا يتغير يبدأ بقفل عم قناوى باب الدخول

عــــم قنـــــاوى

حارس بوابة التلمذة كما كنا نطلق عليها وهى بوابة من الحديد صماء مقفولة عبارةعن بابين ينزلجان على قضيبين نصفا دائرين مدفونان فى ارضية الحوش وتختلف تماما عن بوابة المدرسين فى الجهة الأخرى ناحية الادارة وهى من الحديد المطعم برسومات لزهرة اللوتس من النحاس الأحمر اللامع والتى يظهر من خلفها أحواض الزهور الجميلة تتخللها ممرات من البلاط المزركش تؤدى الى سلم الادارة ويقف على بابها عم عبدالغنى رئيس الفراشين ببدلته الكاكى وطربوشه الطويل منتظرا حضور حضرة الناظر آخذا عنه حقيبته موصلا له الى غرفته مصحوبا بكل التبجيل والاحترام أما عم قناوى فقد كان رجلا طيبا يرتدى جلباب بلدى وطاقية صوف بيضاء ملفوف عليها شال محكم الربط وكأنه مصنوع معها وكنت أحب هذا الرجل لأنه كان يأتى الى منزلنا فى المناسابات مهنئا لوالدى الذى كان يتباسط معه وكان أيضا يحضر لى شهادة النجاح آخر السنة مشفوعة بالتهانى والدعوات التى كنت أحس بصدقها وكانت تأتى معه ابنته صفية ذات الاثنى عشر ربيعا رقيقة الجسم مليحة الوجه كلثومية الخدود متوردة خافضة العينان عسليتا اللون دائمة الابتسامة مرتدية جلباب منقوش بالورود الرقيقة تتدلى على كتفيها ضفيرتان من الشعر الأسود الناعم نازلتان من تحت منديل رأس من الحرير الطبيعى كنت أرى فيها خجلا عرفت فيما بعد انه خجل العذارى وكانت صفية تدخل عند أمى واخوتى البنات لتبشرهن بنجاحى وتخرج محملة بما لذ وطاب حاملة الى اهلها سلام أمى واختاى

الطـــابــــور:

ونعود الى مدرستنا لأن يوم النجاح له حلقة خاصة نعود اليها قريبا ان شاء الله ...

وبجرد أن يرن الجرس ويقفل عم قناوى الباب ماهى الا دقائق معدودة لا تصل الى عدد اصابع اليد الواحدة حتى تصطف التلاميذ كل فصل فىصفان بين كل صف وصف مسافة خطوتان وبين كل فصل وفصل مسافة ثلاث خطوات وكان عددالسنين اربعة فكل سنة ثلاثة فصول ماعدا سنة اولى فكانت اربعةفصول اى اجمالى فصول المدرسة ثلاثة عشر فصلا تقف فى ستة وعشرون صفا فى حوش المدرسة ويقف أمام كل فصل الألفة ومدرس الحصة الأولى ويقف حضرة البيه الناظر وحضرة الوكيل وخلفهم ا لمدرسون الأوائل على الفراندة الأمامية وتحت سارى العلم يقف فريق الموسيقى المكون من عازف اورج وعازف بروجى وعازفى كمان وعازفى طرنبيطة وعازف نقرزان يتقدمهم جمال أفندى مدرس الموسيقى وبجوارهم اربعة من فريق الكشافة بملابسهم الكاكى ومناديل الرقبة الخضراء والباريهات الخضراء يتقدمهم زميلنا حازم اطول تلميذ فى المدرسة ورئيس فريق الكشافة ويدير كل ذلك مدرس كان من أحب المدرسين الى قلبى وقلوب الكثير من التلاميذ ان لم يكن الجميع وهو

عبد ربه افندى عكاشة مدرس الالعاب

وكان يسمى ظابط المدرسة وكان عبد ربه افندى فى الاربعين من العمر ولكن له نشاط ابن العشرين طويل قوى البنية خفيف الحركة كما كان خفيف الظل يحمل فى يده خرزانة طويلة يهش بها ولا يضرب على الاجسام بل على الحائط او شنطة الكتب او الدكة وكان يبدأ طابور الصباح بعد أن يتأكد من انتظام الطوابير فى أماكنها ويهدأ الجميع ولا يسمع صوتا ( تقع الابرة ترن ) ويزأر قائلا مدرسة صفا مدرسة انتباه الكتب على الارض تفتيش الصباح وهنا يمر مدرسى الفصول بين الصفوف يتأكدون من قص الاظافر وحلاقة شعر الرأس ونظافة الحذاء ولمعانه وبعد أن يعود المدرسين أمام الطوابيريزأر زأرة أخرى صفا وانتباه وتبدأ تمرينات الصباح الرياضية وهى تمرينات انزراعية لبعض الحركات السويدية نشعر بعدها بالدفأ يسرى فى عروقنا ثم يلقى أحد التلاميذ وعادة من جمعية الخطابة كلمة الصباح وتكون فى الغالب قطعة شعرية من مؤلفات طاهر افندى مدرس اول اللغة العربية ثم كلمة البيه الناظر وهى كلمة ناصحة تخلط بين الترغيب والتهديد ويزأر عبدربه افندى بعدها بتحية العلم ويبدا زميلنا حازم فى رفع العلم والكشافون الاربعة رافعين ايديهم بالتحية الكشفية ذات الاصابع الثلاثة مع مارش بروجى تليه طبلات متلاحقة سريعة من عازفى الطرنبيطة وبعد أن يصل العلم الى قمة الصارى تتوقف الطرنبيطة وينادى الظابط يعيش جلالة الملك فاروق الأول ملك مصر والسودان وترد المدرسة كلها قاطبة وراءه نفس الكلمات ثلاث مرات ثم زأرة الصفا والانتباه ثم أخذ التمام من الناظر والأمر بالتوجه الى الفصول ونتحرك الى فصولنا مع مقطوعة موسيقية عسكرية لفريق الموسيقى بقيادة عصاة المايسترو جمال أفندى مدرس الموسيقى ويتحرك كل فصل الى حجرته يتقدمه المدرس وجواره متاخرا نصف خطوة التلميذ الألفة

داخــــل الفصــــل

وندخل الفصل ويجلس كل تلميذان ..

ويجلس كل تلميذان على تختة واحدة لها مقعد وقمطران بكل واحد دواية للحبر ومجرى لوضع الأقلام ويمر فراش الدور ويضع من وعاء ابيض يشبه الى حدكبير براد الشاى الحبر فىتلك الدوايات وكانت الأدوات المدرسية نتسلمها من المدرسة وهى الكتب والكراريس والأقلام الرصاص وريشة الحبر وسنونهاالمختلفة وهىسن النسخ العربى وسن الرقعة وسن اللغة الانجليزية وكذلك الاستيكة الرصاص والحبر واقلام البسط بدرجاتها وهى اقلام من نوع خاص من البوص تبرى بطريقة معينة لنكتب بهافى حصص الخط العربى هذا بخلاف أفرخ ألجلاد وزجاجة الصمغ العربى ودبابيس الابرة والمكتب حيث أننا كنا ندفع ثلاثة جنيهات مصاريف العام الدراسى وكان مبلغ كبير حين ذاك لدرجة أنه كانت تعقد لجنة فى أول العام لدراسة الحالات المتقدمة للاعفاء من تلك المصاريف كاملة او نصفها كان يتقدم بها الغير قادرين شريطة أن يكون التلميذ متفوقا فىالدراسة ... وكان ترتيب جلوسنا عادلا ويقوم المدرس الذى عليه اول حصة فى بداية السنة بتنسيقه بحيث القصير فى الصفوف الأولى ويليه الأطول ويستثنى قصار النظر لابسى النظارات السميكة فقط ... وبعد أن نجلس وينضبط الفصل تماما ولا يأخذ ذلك الا ثوان قليلة يبلغ الألفة المدرس بالتمام فيدخل الفصل ويقول الكلمة المعهودة قيام فنهب واقفين فيلقى علينا التحية ويأمرنا بالجلوس وتبدأ الحصة الأولى بأخذ الغياب وتدوين أسماء الغائبين فى ورقة معدة لذلك ويسلمها الألفة للمعاون الذى يمر على الفصول لأخذها ...ثم يقوم الألفة بلم كراريس الواجب أو تسليمها لنا بعد التصحيح من المدرس ....ثم يبدأ المدرس فى التدريس وأول شئ يكتب على السبورة التاريخين الميلادى والهجرى ومادة الحصة وكان عدد التلاميذ فى الفصل لايزيد بأى حال من الأحوال عن الثلاثون أو أقل ......

وكانت حصــــة التـــــاريـــخ

هى الحصة المحببة لنا وكان يدرسها لنا مدرس أول اسمه بطرس أفندى وكان رجلا كبير البنيان أنيق الملبس عالى الصوت وأتذكر أنه كان يدرس لنا تاريخ الثورة الفرنسية وكان يلقى علينا الدرس بطريقة درامية تتحرك يداه مع عضلات وجهه مع ارتفاع وانخفاض صوته حسب الأحداث وكان يبلغ حدة الدراما عندما يصل الى وصول الملك والملكة الى المقصلة ولحظة نزول الجيلاتينا على رأسيهما لدرجة اننا كنا نصفق له اعجاباا ....

أما مدرس اللغة العربية طاهر أفندى

وكان هو المدرس الأول وكان شاعرا رقيقا عف اللسان مهندما دائما فى جيبه ديوان شعر يقرأ فيه وكان بينى وبينه صداقة جميلة لدرجة أنه كان يقرضنى تلك الدواوين لأقرأها وأعيدها له وكان رخيم الصوت حينما يقرأ الشعر يخيل اليك أنه يلحنه ويتغناه واذكر أن أول بيت شعر كتبته فى حياتى ووضعته فىديوان كنت مقترضه منه وكأننى نسيته فوجئت به يكتبه على السبورة ويقوم بشرح كلماته ووزنه واظهار مابه من حسنات وأخطاء ولن أنسى ما حييت هذا الموضوع أبدا والبيت كنت أقول فيه .
أبى وأمى وقبل جدتى وجدى * أحب ما خلق فى الوجود ربى

أما اللغة الانجليزية فكان يدرسها لنا مستر صلاح

وهو شاب أنيق جدا أسمر سمار أبناء الصعيد فقد كان صعيديا من سوهاج وكان ضليعا فى اللغة وان كان يشوبها بعض قليل من لهجته الصعيدية وكانت تضفى عليها رونقا خاصا كان مسار اعجابى وأتذكر أنه كان يدرس لنا ثلاثة كتب هى رواية روبن صن كروزو الشهيرة وكتاب القواعد الجرامر وكتاب المطالعة وكان عنيفا بعض الشىء لا يقبل أعذارا لمن ترك الواجب أو لم يحفظ الكلمات كما كان يسخر من التلميذ الذى يخطأ فى النطق وكان له لازمة يقولها وهى أنا جولت الانجليزى بتعطيش الجيم صعب على الفلاحين لأنه كان يعتبر أن كل من لم يكن من الصعيد فلاحاا ولكن شهادة أمام الله أننى أدين لهذا الرجل بمعرفتى باللغة الانجليزية السليمة كتابة ونطقاا ..

ولنا عودة الى نظام اليوم الدراسي والفسحة قريبا باذن الله

يوم من ايام الطفولة

فى حى شعبى تربيت ومارست طفولتى وشبابى وهذه مذكرة يوم من ايام الطفولة

استيقظت من النوم عند آذان الفجر الاول وتوضأت وصليت مع ابى وشقيقى الاكبرفى المسجد القريب من المنزل وعاد ابى وتوجهت انا وشقيقى الى المخبز لشراء الخبز وفى عودتنا اشترينا الفول والطعمية من عم أبورحمة والعسل والطحينة من الحاجة أم حسان وعدنا الى المنزل وقابلتنا أمى ببشاتها الدائمة حبايبى صباح الملك للمالك وأخذتنى جدتى فى حضنها وياله من حضن آخرته قرش صاغ أحمر لى ونصف فرنك فضة لاخى الاكبر ......وبعد قليل دخلت اختى الكبيرة تحمل الطبلية وجلس ابى وامى وجدتى واخوتى وجلست انا بين ابى وجدتى

الافطار :

الافطار مع العائلة بعد بسملة ابى ودعائه لنا بالرزق الوفير وهداية الطريق وتاميننا عليه له طعم جميل ولا أنسى مهما طال الزمن يد جدتى التى ملأتها التجاعيد كم هى رقيقة وهى تقشر بها البيضة لتعطينى اياها قائلة وضحكتها رحمها الله مازالت ترن فى اذنى حتى الآن كل ادينى سبقت أمك اللى لسة بتقشر لأبوك ... ثم ننهض كل الى حجرته نلبس ملابس المدرسة ويرتدى أبى قفطانه الشاهى الناعم تعلوه الجبة الكشمير (نوع فاخر من الصوف ) وعمامته ألأزهرية وحذائه الأجلسيه اللامع وفى يده مسبحته اليسر فقد كان رحمه الله رئيسا لقضاة المحكمة الشرعية بعابدين آن ذاك ثم يأتى صوت أم ابراهيم وهى سيدة فى سن والدتى من بلدتنا تعيش معنا تساعد أمى واخوتى البنات فى الاعمال المنزلية معلنة عن وصول عم مجاهد بالحنطور .....الذى اقفز راكبا جواره على كرسى القيادة ويركب أبى وأخى ألأكبر واختاى وبعد أن يأمره أبى بالتحرك أسمع كلمة توكلنا على الله ششييي.......وكأن الحصان يسمع وتبدأ

رحلة الصباح المكررة

ويبدأ الحنطور فى التحرك من أمام بيتنا ترمقه أمى من خلال المشربية العرابسك ( الارابسك) كما ينطقونها الآن والتى الوح لها مودعا .
وتتوقف برهة أمام أنور ابن عم حسين بياع الجرائد ليأتى بخفة ويناول والدى ألأهرام والمصرى وهى جريدة ناطقة بلسان حزب الوفد آن ذاك والذى كان ينتمى له ويعطيه والدى قرش صاغ أحمر ثمنا للجريدتان ، وينعطف الحنطور الى الشارع خلف سورالمدرسة السعيدية لينزل أخى الاكبر مرتديا حلته الصوف الرصاصى ذات البنطلون الطويل وعلى رأسه طربوش أحمر قانى (الطرابيشى ) وفى يده حقيبته الجلديه متسلحا بنصف فرنك وهو عملة فضية سداسية الوجه مرسوم على وجهها الاول صورة الملك فاروق الاول والوجه الآخر مكتوب عليه قيمتها وهو قرشان ونصف قرش صاغ ويمر من امام الحنطور منتصبا يسير فى خطوات سريعة متجها الى باب الطلبة مشفوعا بنظرة حانية مملؤة بالاعجاب المستتر من أبى فقد كان فى الثقافة وهى شهادة قبل التوجيهية كانت تؤهل حاملها على دخول المعلمين العليا والبوليس والمعاهد العليا . وبعد ذلك نتجه الى ميدان السيدة زينب وفى اول الميدان كانت تقبع مدرستى الابتدائية مدرسة محمد على باشا (مؤسس العائلة الحاكمة آن ذاك ) واسمحوا لى قبل أن أسرد يومى الدراسى أن أصف لكم

الزى الذى كانت ترديه أختاى وكانتا تلميذتان فى المدرسة السنية للبنات

ناهد رحمها الله وكانت تعمل محامية وأميمة أطال الله بقائها وكانت تعمل محاسبة والآن تقاعدت وللعلم فهى أم زوجتى أبنائى وكانتا توأم متشابهتان الا فى الطول ترتديان حين ذاك ملابس المدرسة السنية وهى من أعرق بل أول مدرسة لتعليم البنات فى مصر المحروسة (القاهرة ) حذاء اسود مقفول وجورب رصاصى يغطى الساق ومريلة كحلى تغطىمنتصف الساق وهى شبيهة بما يسمى الدريل حاليا وتحتها قميص ذو أكمام طويلة لونه رصاصى وايشارب أبيض يغطى الرأس و الرقبة تنسدل من خلفه على الاكتاف ضفيرتان تصلان الى منتصف الظهر تقريبا وكنت أرى فى شقيقتاى أجمل وأرق ما خلق الله كما كان يقول عنهن ابى وكما كانت تتغنى لهن جدتى بنتينى الحلوين مين زيهم مين ـ

والى اللقاء قريبا مع ذكريات اليوم الدراسي

##############################################

معلومة : هذه المذكرات أكتبها من الذاكرة مباشرة وليست مدونة وهى تقع فى اوائل العقد السادس من القرن الماضى حيث كنت فى العاشرة فأرجو المعذرة عن ما قد لا تسعفنى ذاكرتى من سرده

...........

###############################################

خواطر ثلاثية ...ج4

فيه كلام يرطب القلب زى العسل
وفيه كلام يدمع العين زى البصل
وهو بين ده وده كـان اللى حصل
ودمتم..... وأشكركم ....

********************

دموعى من عيونى شلال
من حلو كلام جميل يتقال
لمس أوتار القلب و طال
ودمتولى ..............

*********************

وكان يوم ولا كل الأيام
غنت فيـه المـدافع أنغام
حقق الجيش كل الأحلام
ودمتم يا كرام ..........

*********************

.

هو احنا خلصنا مـن العنب يطلع التوت
ليه نسيتو من البرتقال الى اسمه شموت
اصـلى انـا بحـب عصير الفواكـه موت
ودمتم ........

************************

شتمنا وردينا عليه ودعينا
وبعدين رجع صعب علينا
أصله صاحب مرض لقينا
ودمتم ......

*******************.

صعب عليا أسمع كلام ياذينى
وفى حالة زعل وهـم مخلينى
لكن حبكم ليا هو اللى معزينى
ودمتم ......

******************

شوف ياعم راضى انا احب اكون فعال
احب الم الأمور على طول وفى الحال
أصلى ماحبش كلام مايجيش على البال
انشغل آه أطنش لا

ودمتم.......

**********************

حرارتى ولا حرارتك ما تفرقش
هو حد حاشك وليه ماتكتبش
اكتب يلا حبة ولو بقرش
ودمتم......

*******************

عاش عاش عاش كل الرجال
وعاشت كل من ربت رجـال
متعلمين مثقفين احرار أبطال
ودمتم ........

**********************

يابلدى دنا نبته متربية على خيرك
مروية بمية من مساقى ترع نيـلك
نفسى لما أموت يرجعـونى لطينك
ودمتم .........

***********************

اعدموه ومـوش مـهم الطريقة
حتى لو تعملولوا ولعة حريقة
ولا ترمـوه فى مغـارة عميقة
ودمتم ...............

**********************

آل ايه مايتعدمش عشان المحكمة عميــلة
دا اعدامه أرحم ليه من فرجة ولا السيمة
لما طلعوه من المخبأ متهزأ مقلول الايمة
ودمتم ..........

***********************

الجهاد على كل مسلم واجب
الجهاد موش بس للى للحصان راكب
الجهاد بالنفس والمال والعلم وعمايل الواجب
ودمتم يا أهل الواجب ..........

********************

مع انهم كبار لكن عليا صعبنين
اخوانــا المجاهدين فى فلسطين
الغدر والخسة عليهم متجمعين
ودمتم للواجب ........

*********************

اهو الوزير حسنى خاب
وف سيرة الحجاب جاب
وحينول من سيدوالعقاب
شلوتين وخبطتين قبقاب
ويعين لنا وزيرة بالنقاب
ويبقامع المعارضةأحباب
ودمتم .........

***********************

نمرة محمولة ومقفولة
ترد عليا غنوة مقفولة
حد يشوف دى الفولة
وعودتم ........

**********************

.

محمولى نمرتو من زمان
معايافى كل مكان وزمان
يمكن الغلطة دوسة بنـان
ودمتم .........

***********************

يارب يارحيم يا رحمان
حمل قلوبنا الخير والحنان
وكتر المحبة بينا كمان وكمان
ودمتم .........

**********************

ام فاتوا ومفيش حد أكلمه
المنتدى فاضى بوابه مبرشمه
شبابيكه مقفولة والدنيا مضلمـة
مالكم .........

***********************

عمال تلفلف ليه دا المحلة فيها اعتصام
عشان لحمها راح وفاضلشى غير العضام
ماعدتش تبعك ولا لـحد مـن محاسيب النظام
ودمتم ..............

************************

واللى من نسل الصحابة
ولاد ناس متربين غلابة
عندهم شوية من الرتابة
ودمتم ........

***********************

طالما المحبة بقت غنوة متلحنة حروفها
ماعمر حد حيقدر ينسى حرف من حروفها
أصل الحروف المتلحنة من الصعب لى حروفها
ودمتم ........

************************

الكتابة اصلها الحروف
والحب حرفين من الحروف
اللى يفهمهم يبقى فهم كل الحروف
وما دايم غير ألله .........

خواطر ثلاثية ج3

روحت أنقـذ غـريق من الجهل غرقنى
ياترى حد بيقرا كلامى ومش مصدقنى
ولا بهاتى لوحدى ومفيش حد بيسمعنى
ودمتم......


أنـا لجل البشركل عمـرى فنيت
واللى فى بلاد الله الواسعة لفيت
وغير البهدلة من البشر ما لقيت
ودمتم........


شئ أكـيد اننا كلــنا حنموت
وعملنا فى الدفــاتر مثبوت
ومنا اللى يقع واللى حيفوت
ودمتم.......


يعز عليا بكا ونحيب
خصوصا لوكان لحبيب
ما عدلوش فى الدنيا نصيب
ودمتم ........


موش كفاية كلمة وداع
لمفارق وقلبه عليكم ملتاع
معرفش يكتب واسلوبه ما راع
ودمتم ...........


يسلام عالدنيا وفيها أصحــاب
يبقى طعمها حلـو لذيـذ عنـاب
مناكشة ومحبة وعودبعدعتاب
ودمتم .......


مالكم كدا ليه متصربعين
تـاك آواى أكلين شاربين
دانتوا عالقهـاوى قاعدين
ودمتم .......


طالع النخل العالى أجيب رطب وحيانى
لاجل ما حبيبى يصبر عليا ويستنانى
ويعرف انى ديما راجعلوا من تانى
ودمتم .......


ولا كل من مسك المكرفون قوال
ولا كل من دور النول غزال
ولا كل من شال شيال
ودمتم .......


لبنان قاوم لوحده ثلاثين ليلة ونهار
استحمل ولاده ميه وخمسين ألف انفجار
والنهاردة الفاراستأسد ونسب لنفسه انتصار
ودمتم .......


طظ فيكم ياحكام العرب والف مليون طظ
طظ ملح بالتركى والله ما تسوا رشة طظ
نملحكم ونحنطكم ونحط عليكم شوال طظ
ومادمتم .......


هو بشار وأنا منشار حقطع كلام مندار
واحد مأمأ والتانى نهق والحر بينهم حار
والأسد لما يجوع فىالجنينة يدبحولوا حمار
وماداموا الأندال .......


أسد من الجحر طالع زى الفيران
وبعد أبوه ماباع بالدولار الجولان
بـاع الحريرى والتمن كان لبنــان
ودمتم ....


اهم اتخانقوا ولبعض بيعايروا
مين اللى باع ومين اللى سايروا
وعملين مكلمة و عمالين يتحاوروا
مادامو .........


عملوا قاعدة وقالوا حنعمر لبنان
وكمان حنزيلوا آثار العدوان
كنتوا فين ساعة اللى كان
ودمتم ......


فيه مـرض صعب اسمه الوسواس
بيحطه فينا ابليس الملعون الخناس
ربنا يكفينا شر الوسواس والخناس
ودمتم ...........


بسمع بودانى وببكى
طب هو فيه ودان تبكى
ما الودان تسمع والعين تبكى
ودمتم .....


.وشوش مترصصة تعابير
وبئاء خطوط من غير شفاتير
الصفة المشتركة كلهم بلا مناخير
ودمتم .........


ياه وحشها كلامك الخواطر
من زمان ما طليتى ياهاجر
كان فيه كفالله الشـر ســاتر
ودمتم ........


دخان فى الهوا دخان
فين عقلك يا انسان
يللا نبطل الدخان
ودمتم .............


دربنا النفس عالجهاد من اجل صوم رمضان
صمنا اتنين وخميس وايام مفترجة من شعبان
واحد بيقول السجاير متفـطرش عشان دخان
ودمتم .............


أجازة خمس تيام فسحة
نسيب فيهم المطرح والفسحة
عالبحر موجة ونسمة هوا شرحة
ودمتم ..........


بابا اتكعبل فى كلمتين وقـع
نفسى على قفاه قلمين يترقع
عشان يبطل يعمل واد جدع
ودمتم ..............


طفـوا النـور عالصـفين
لما يعـدى غراب البين
بـابـا مكسح بلارجلين
ودمتم .......


سمة حية عاملة فحيح
فاكر انه لسانه فصيح
مـع انـه مـلك التبجيح
ودمتم ......


رمضان جانـا شهــر كريم
يتسـلسل فيه كـل ظالم أثيم
خيره كتير وكل أيامه نعيم
ودمتم .......


هوموش برده ليلة القدر منيه
و نزل القرآن فى ليلة من لياليه
واتملى النبى لما جبريل قراله فيه
ودمتم .....


عمـو جايب لينا فانوسين
منور لينا فيـهم شمعتين
الله عليهم يا صلاة الزين
ودمتم .......


صوم وصلاة وتراويح
واعتكاف وصدور مشاريح
وتهليل وتكبير وكعك ومراجيح
ودمتم .......


اول سطـر صلاة وصيــام مرفوع
تانى سطر دعاء لله وللنبى بشفوع
تالت سطـر تكـــبيرلأذان مسموع
ودمتم .............

خوطر ثلاثية ..ج2

فرحان بيكـم قوى وانتم بتباركولى
ربنا يخليكم ليا وديما كدة تجاملونى
دا واجبكم على راسى وملو عيونى
ودمتم .......


ياعم كفاية ارحم أهلينا
دا نفسنـا صعبانه علينا
هو انـت مكتـوب علينا
ودمتم .....


امشى عدل ومتعملش شاطر
ومتقباش بــين الناس شاطر
لحسن مايقعش غير الشاطر
ودمتم ........


قفـلوا عليـا زنزانـة بابـها حـديد
بصيت لفـوق لقيت شباك حـديد
ناديت ردعليا سجان قلبه حـديد
ودمتم ........


قلمـك حصـانك لو صـنته صـانك
ان هاجمت بـالحق يكـون سلاحك
ان هوجمت بالباطل يكون دفاعك
ودمتم .......


الخيانة بقـت فى النـاس طبـع
وبرقع الحيا اهم رفعوه رفــع
والعيون نشفت وخلص الدمع
ودمتم ......


لا تقول عرفنا ولا لسـة معرفناش
لا تقول شفنــا ولا لسـة مشوفناش
قول عرفنا وشوفنا بس مصدقناش
ودمتم .........


أنا النهارده موش عارف ليه متلخبط
الحروف قدامـى عالبـوردة بتـتـنطط
لاعارف أكتب ولا أرسم ولا أشخبط
ودمتم .......


موش قادرأغمـض عنيه
موش قادرألمـلــــم اديه
الحمـل تقـل قـــوى عليه
ودمتم .....


أنا مايهمنيش تفضل ولا تفارق
ماعدش موضوعك معايا فارق
من ساعة ما اتـنـشيت وبتتعايق
ودمتم......


الحـلم جمـيل لكن طلع خيال
ياريت الحــلم ده كــان طــال
أصله كان حـلم مـوش عالبال
ودمتم ......


ياللـى شعلقتـنى فـى حبـالك
وسبتنى ورحت علـى حالك
ومبقتش فى فكرك ولا بالك
ودمتم .....


.البلد دى صعبان عليا اللى بيها
مـن اللى ولادهـا بيعمـلوه فيها
بدل مايرفـعوها بيدوسوا عليها
ودمتم .....


ايه ياحاوى خلص اللى فى جرابك
أصل شايفـك كـده انكـشف حـالك
عمال بتتململ وقلت قوى حركاتك
ودمتم .......


اتعودت مازعلشى من ا لعـويل
واتعودت متعزمش عند ا لبخيل
واتعودت متكلمش مـع ا لرزيل
ودمتم .......


أهوكدا شمت فى نفسى العدى
وأهواتحيرت ما بين دا وادى
يارتنى ما عرفت دا ولا ادى
ودمتم ........


الله عليكى يا سوتى لمستى لمسه
فى موضوع ملمستوش ملامـسه
الكلام فى العمر كتير و ياما لسه
ودمتم .....


بيحسبوا العمر مع كل هلت قمر
وناس كل سنة يعملوا حفلة سمر
ومحدش عارف مخبيلوايه القدر
ودمتم ........


اللىيعتبر من السنين يعدى بحر موش قنا
اسألوا اللى جرب واللى شاف اسألونى أنا
كنت زمان فى شبر مية أغرق وأموت أنا
ودمتم .......


أمال ايه فايدة اللى علموهنا أهـلنا
طب و هندسة ورسم وفنون الـغنا
وأسرار كنوز مدفونة جوا أرضنا
ودمتم .....


حتفضلى كتـير قلبك عليا بخيل
وقلبى حيفضل كتير كـده عليل
حلفتك خليه ولو مرة عليا يميل
ودمتم .....


أنا مــوش حسيبك وحفضـل وراك
لحـد ماعـرف اخريـتها ايـه ويــاك
ماهو ياتيجى عندى ياجى أنا معاك
ودمتم ......


آآآه يامصر قبلت أكون بقرة ....تحلب
حليب لاجل ما تسقى ولادها ....تدور
ساقيةلاجل ما تسقى بميتها ....نبتة
شجرة لاجل ما ضلتها ....تحمى ولادك
ودمتم .......


آآآه يامصر قبلت أكون همجى .....وسخ
متمرمغ فى تراب أرضك
لابس غزلان من غزل قطنك
مستحمى بمية بركه من بركك
ماهولازم ضرورى أشيل همك
وخلى ولاد الايه يقولوا دا همجى ....وسخ
أنا راضى أكون بقرة وهمجى بس أكون ابنك
ودمتم .......


فيه ناس حقها عند ناس ينداس
وعند ناس يتشال على الراس
وناس تالتة تدونه فى الكراس
ودمتم .......


ياعــينى عليـه عالولد
اتمنـيته بـنت جــه ولد
هدية من الواحد الأحد
ودمتم ......


يومين بدون كتابة ولا حوارت
مع نفسى وبعيد عن المتاهــات
أفأفة وأهأه واستغفار وتشهدات
ودمتم.......


وادينـى راجـع تانـى باشـتراطـات
مع نفسى موش حكتب فى حاجات
السياسة والدين ومشاكل الحريـات
ودمتم .......


ححـكى حكايات من الزمن اللى فـات
أنا حقول وانتوا اسألو وخدوااعتبرات
ذكريات وخواطر وكتير من الرويات
ودمتم ........


اشى شخصى واشى عالصحبات
وحرسملكم بالحروف تابلوهــات
من بلادنا ومن بلاد الخـواجــات
ودمتم ........


سعيد مات وكانت النتيجة بكا
سخيف مات وآهو النتيجة بكا
نجــم مات وبرده النتيجة بكا
ودمتم.......


ياقانا مرتين يغدروكى
الأولانية أمـك وأبوكى
والثانية أختك وأخوكى
ودمتم.............


لبنان ياعروسة خطفوكى
كلاب و خنازيرسعرانة
بأنياب مسعورة عضوكى
وعيون ولادك سهرانة
مايناموا لجل ما يحموكى
وولاد جيرانك حيرانة
عايزين يهربوا ويجوكى
دانتى فى الرقبة أمانة
صرخة واحدة سمعوكى
وقلوبهم بحبك مليانة

ودمتم.........


حسن نصر الله الدنيا ذكريات
تحت الحزام ضربوك زى السادات
حكام عرب نصهم مساطيل والتانى عاهات
ودمتم ........

خواطر ثلاثية " ج 1

لا أنـا مـوش كدبة دانــا الحنان
بس انت اللى نسيت ايام زمان
أيـام ماكان بينا اللى كان وكان
ودمتم ......


***********


ياشمس من غير شعاع
ياقارب من غير شراع
يا مسافر من غيروداع
ودمتم ....


***********


ليه كل دا العــــذاب
كل مانـوى العتـــاب
تشاورلى عـالدولاب
ودمتم .....


***********


فين الرقة فين الحنان
فين الحب بتاع زمان
فين الشوق اللى كـان
ودمتم ......


***********


لما انت فاكـر الحب بتاع زمــان
وانا لسه ســـاكن نـفس العنـــوان
بتبعد عنى ليه قلبك حجر صوان
ودمتم ......


************


يامهشتكنا ومبشتكنا فى كل مطب تعدى عليــه
يا مفركشنا ومعكننا فى كل قرار بتمضى عليه
يامأستكنا ومرستكنا فى كل بيان بتصرح بيـــه
ودمتم ........


***************


كـــــان غيــــــــرك أشـــــــــــطر
كـــــان مــــــــاشى يتمخــــــــطر
أهـــــو وقـــــــــــع اتشحـــــــطر
ودمتم ......


**************


تضرب فى الظهر وتقـــول ماخونتش
تشوف وتحلف وتأكد انـــك ماشوفتش
تزوغ وتهرب وتقول أصل ماعرفتش
ودمتم......


************


كلام على ورق مكتوب
العين لازم تشوف المكتوب
يابن آدم عملك على جبينك مكتوب
ودمتم.......


**************


الاولى آه عالادين تنشال يوم ميلادك
التانية آه عالرجلين تنشال ايم شبابك
التالتة آه عالأكتاف تتشال يوم مماتك
ودمتم .......


***************


يا جاسر انت فين بناديك
حفضل كتير انادى عليك
هـو الكلام يحـلى الا بيـك
ودمتم


*************


توبه واعتبرها آخر توبه
امحـى ذـنوبى آخر نوبه
ما حـغلط تانى آخر توبه
ودمتم .....



***************


دا أنا حبى جد و معطر
يا قلم المحبة اكتب و سطر
خللى قلبى يرقص و يتمخطر
ودمتم ......


*************


بقالكوا سنين كاتمين علينا
انـــتوا قــدر مكتوب علينا
ماتحلوا بقــــا مــــن علينا
مادمتم......

فاطـــمة ..... ياســوتى

فاطــمة........ ياسـوتى بتسألى مـين هـــــــــيا

فاطــمة........ياسـوتى أمى وأمك والخالة بهية

فاطـمة........ ياسـوتى أرض مصر ألعفـــــية

فاطـمة........ ياسوتى غنــوة حلــــوة مصرية

فاطـمة........ ياسوتى بلـــدك بلـــــد الحــرية

فاطـمة........ ياسوتى بلــدك وبلــدى ألأبـــية

عرفتى ياسوتى فاطـمة........مــين هــــــــيا


26-4-2006

رمضــــــان ولــــــــــــــــــــى

رمضان مضى
وكنـا لا نحـب الــوداع
رمضان ولى
و أيـامه مــرت ســراع
الناس صومى
فـى عبــادة وانـطيــاع
الوجه تجلى
قـرآن قراءة واستمـاع
المدائن والقرى
حب وسماح وانصياع
للصوت صدى
فـى المـآذن والمـذياع
البينة لمن ادعى
الله أكبر وله الارتفاع

22-10-2006

ذكـــرى يــوم العبـــور

يوم عبور القوات المصرية لقنال السويس يوم لا ينسى تاصلت فيه الوحدة الوطنية
ولى شرف المشاركة ولى شرف الاصابة وهذه خواطر متواضعة استسمحكم

صــورة جميــلة جـــــوا بـــــــرواز
متغلفـــة بلـــوح شفـاف قـــــــــــزاز
مرسوم عليـــها نــــاس عــــــــــزاز
محـــمد وبطرس وخليل وفـــــــــواز
زملاء ســــــلاح ابطـال افـــــــــزاز
ابطال عبورهم للقنـــال اعجــــــــاز
عبروا القــــــنال فى يوم الانجـــــاز
الشهادة نالـــــها بطرس وفـــــــــواز
ومحمد اخـــذ نيشــــــان المـــــــــاظ
وخليل حضرت معاه حفلة الجـــــواز
والصورة الجميلة فى البــــــــــــرواز
لمحمــــد وبطــرس وخليل وفــــــواز

20-4-2006

السجن موش قضبان...السجن يا سادة ....

السجن مــوش قضبان وراها مســجون

ولا عصفور عايز يعيش على الغصون

ولا أســـد مع قـــرود السيرك مشـحون

ولا دمـعة حـزن محبوسـة فى العيـــون

ولا صـرخة مولـود عـايز أمه الحنــون

ولا مناضل شهروا قالـوا عليه مجنــون

ولا حر بيركعـوه لسيده ويقـول ممنـون

السجن يا سادة كلمـة ممنوعة بالقانــون

الســـجــن أقــلام مــن غيــر سنـــــــون

السجن رقــابــة مانــعـــــــة للـــفنـــــون

الــسجــــن شـــبــاب عاطــل محــــزون

السجن قهــاوى مليــانـــــة بالــــزبــــون

السجن مـال تـــحـت البـــلاط مـدفـــــون

السجن عـلم عـــلى الرفــوف مــركـــون

السجن اقتــصاد عـــايش على الديـــــون

السجن موظــف على مكــــتبه فرعــــون

السجن عـــــالـم جــــوا معمــله مخـــزون

السجن رغيـــف عالاستــــيراد مرهـــون

السجن موش قضبــــان وراها مســـجـون


13-8-2006

من تلاتة وتلاتين عـــــام

زى النهاردة من تلاته وتلاتين عام

والهجرى والميلادى اتلاقوا دا العام

والسـنين مرت والذكريات ما تــنام

وكان يوم سبت وعندهم عيدوسلام

لا عــيدوا ولا شافــوا يومها سلام

طيران دك حـصون وفجر الألغام

ومدافع النصر لحنت حلو الأنغـام

وجنود جولدا هربوا زى الأغنـام

مـــاهم شافوا وحش زى الأفـــلام

كان يامكان من تلاته وتلاتين عام

ودامت الأيام ودمتم
............


4-10-2006

الــلـه عليك يا نيـــــــــــــل

الله عليكى يا وقفة على شط النيل

فى ضل صفصافة فروعها عالمية تميل

وناى بينـغم ويقـول لنـا أحلى المـواويل

مواويل ..الصبر ..وأيـوب ..وياليل

ويغنيلنا غنيوة الست شمس الأصيل

ومركب شراعها معبى هوا العصارى العليل

صيادها رامى شباكه وراضى بـرزقه القـليل

وصـبية نـازلة السلالـم تملا مـية سـلسـبيل

تملا بيها زير .....زير أبوها عامله سبيل

على شطـيك غيـطان قطـن وكتـان وتـيل

وغيطان قمح وشعير وقصب خد الجميل

والشمـس نـازلة مروحـة بعد يـوم طويل

راسمة على صفحتك ألوان مالهاش مثيل

وفارس راكب على ضهر مهر عربى أصيل

مــهر رهـوان مركـبين فى رجلـيه خـلاخـيل

وسرب الحمام طاير أعلى من جريد النخيل

مروح لأبراجه فى حواصله أكل الزغـاليـل

صورة متصورة راسمها اللى ملوش مثيل

رب العباد الواحد بادع كل جميل

الله ..الله ....عليك يانيــــل


29-7-2006 ..

ميدو لعيب

بمناسبة كأس العالم هذه الخاطرة شبه حقيقية ::

عبدالحمــيد ابن أم ســـنية عـــيل مالــوهـش مثـــيل

شقــى ومعـــــفرت وفـى الجــــرى نفـســـه طـــويل

وان عيــل ضربــه يقـــع عـالأرض تقــولش قـــتيل

وان حــط الكورة فى رجله هــات فى العيـال تغزيل

وطول ما بيلعـب العـيال عالصــفين نــازلين تهـــليل

وفى يوم أخـذ العـيال وراح يلعـب فى شــارع الــنيل

شافـــه الكابـــتن ميـــمى وقــال له تعـــالى يا جمــيل

العـــب فى النـــادى علـــى ملــعب أرضـــه نجـــــيل

وهنـــاك فى النـــادى حـــاله اتغـــير واتــبدل تـــبديل

نقـــدية ورعــاية وتغـــذية وكشــوف طبــية وتحــاليل

ومــدربــين اللـى مـن ألمــانيــا واللـى من البـــرازيل

و اسمــه بقى مـــيدو اكمــن عبدالحــميد ريحـــه تقــيل

ومـــيدو مـع اللى يدفــع أكـترمن العتــاولة أو العنــاتيل

وبقى له أصحـــاب من الحــكام والـتجار وأهـل التمثيل

ومع كـده الـــواد مـــيدو ابن حـــارتنا طلـــع واد أصيل

جوز أخته سـنيه واشترى لأمه شقــةعلى شـــارع النيل

وفتـــح فى وســط البــلد سوبــر مــاركت لأخـــوه قنديل

وجــاب ميكروبــــاص مــــاردونـــا تــــيوتا لعمــه خليل

وأهو عبد الحميد ابن أم سنيه بقى ميدو اللى مالوش مثيل


18-6-2006

ــــــــــــــــــــــــــــــــــــــــــــــــــــــــــــــ

ملحوظة: عندما قام بكتابتها رحمة الله عليه لم يقصد منها ميدو شخصيا ولكن تركها معممة حتى يخمن كل من يقرأها من ينطبق عليه ذلك
وكما قال : المعنى في بطن الشاعر

حبوووووا جمال ودلعووووه

دلـعوه ابـن ابـوه دا صغـير يـتهشـتك
مـرجحـوه دا كان ابـوه ريـس متأنـتك
هننــوه بالـراحـه علـيه ليقـع يتـفرتك
حتشوفوا كتيرأصله خلاص اترستك
وعمـله بـره يـجى كام ملــيار أسـتـك
دلعوه دا شـبه ابوه بـس واد متـبشـتك
دلـعوه ابـن أبـوه دا صـغـير يتهـشـتك
اغنية الحفلة اقدمها هدية .....يوم التنصيب

17-6-2006

دعـاااااء

تهاوى الخراب وارتفع العمران
عشعشت الغـر وفـرت الجرذان
غـردت الحمائم وعـلا الكـروان
دقـت الأجـراس وارتـفـع الآذان
وعلـت اصوات عبـاد الرحـمان
بدعوات جـلال هــزت الأركان
يا أقصى عائدون نطهر المكان
عائدون نصلح ما أفسده الجبان
سنحفر الـبئر ونـزرع البسـتان
سننـثر العطـر ونشـتل الريحـان
القـدس لنـا نفتحـها لـكل الأديـان

تهـــادنت الاعــــادي

تهادنت ألأعادى وتراجــلت ألفرســان
تغامدت ألهنادى وتعـــانق ألخصمـــان
تماسكت ألأيادى وتشابكت ألأغصــان
تصاعدت ألأغانى وتناغمت ألألحـــان
تصادحت الشوادى وتراقصت الحسان
ترانمت الحــــوادى وتمــايلت الــغوان
تســــاررت النواجى وتشــانفت الآذان
تــداعــبت لمســـاتى واهــتز الوجـدان
تعـــاذبـت همسـاتى وتـوقــف الزمــان

واقـــدسااااه

نرفع ماذا ؟ حمل واحتملناه
آآآه ثم آآآآآآآآآآه واقدساااااااه
بورك أقصاكى وما حولاااه
بالله وما أنزل على محمدااه
لنثأر لكى ياقدس من الطغاه
سنقدم لك كل نفـيس ادخرناه
النفس والولـد والمال والجـاه
حثالات صهيون ومـن وراه
سندق رقابـكم بالأقدام الحفـاه
ألم تقولوا وأسيادكم عنا حفـاه
أطفالنا بالحجارة أثخنوا القفاه
فلسطين رطبـة يلوكـها العتاه
أتركونا حـكام البـلادة يـا ولاه
نتحرر من صهيون ومن ولاه
اتركونا فخوفكم ظهروعرفناه
ولم يبقى لكم عندنا حول وجاه
اتركونا نحررقدسنا واقدسااااه

خــلي بــالــك مـــن ...

خاللى بالك من بنت عمتك وحطها فى عنيك
كلمات انسابت من بين شفتى زوجتى لابننا ليلة زفافه
كلمات حركت زكريات اعادتنى الى يوم بعيد وانا فى
العاشرة وهى فى الخامسة وكان يوم مولد الرسول عليه
الصلاة والسلام وهممت للذهاب الى الميدان لمشاهدة
الاحتفالات وتعلقت بى وقالت جدتى نفس الكلمات لى
خاللى بالك من بنت عمك وحطها فى عنيك
واخذت بيدها وعبرت بها شوارع الحى وما زلنا نعبر
معا شوارع الحياة بحلوها ومرها .... حملت عنها حقيبة
المدرسة وحملت معى عبأ السنين .... أهديتها باقات الورود
واهدتنى اغلى ما فى الوجود ولدى واحفادى .... أخذت
بيدها لنعبر الشارع الصغير فعبرنا معا ميدان الحياة
الكبير.... مسحت عنها رزاز مطر الشتاء ومسحت عنى
عرق العمل والعناء .... ورغم مرور السنين والتى جاوزت
الخمسين مازال الدفأ يسرى والعطاء متبادل وزكريات
الطفولة شوقها يزيد ....ورد الضفائر ....فرحة العيد ....
الارجوحة ....عروسة المولد والفستان الجديد ............
خاللى بالك من بنت عمتك وحطها فى عنيك

مــن يـــكونـــوا

زرعوا الشر و حصاده قنابــــل
وزرعنا الخير وحصاده سنابــل

قسموا الارض حقول الغـــــــــام
وقسمناها مزارع ومراعى اغنـام

بنوا دشم وحفروا خنـــــــــادق
بنينا عماير وبيوت وفنــــــادق

حياتهم هدم وخراب ودمــــــار
وحياتنا بنا وزرع وعمــــــــار

عـــودي الــي...

عودي الى ... ياليتك تعودي وترضيـــــن

انا لا اطيق الفراق والبعد... والحنيـــــــن

يا معذبتي ألا آن لقلبي ان يهدأ .. ويستكين

لماذا هذا الصمت.. والــظـــلم ألا ترحميـــن

ألست من كنت بالحب تؤمنين واليوم تعذبين

أطلت عذابي أهكذا عن الحب .. تعبـــرين

يامن جعلت القلب حزين اما أن ان تسعدين

قلب التاع من الانين وامتلأ بالحزن الدفين

كـــــــلما اقــــــرب منــــــك تصــــديـــــن

وانـــــا اعــــرف اننتــي من تـــحبيتــــــن

وبــــحبـــــي بعيــــــدا عنــــي تعترفيــــن

بــــربــــــك لمـــــاذا بقــــربي تنكــــــرين

اهـــــكــــذا يــــفــــعـــــــل المحبيــــــــــن

عــــــودي الــــي فـــــأنـــا فـــراقك يوذين

شاب اسمه امــام

شاب ظريف اسمه امــــام

شايف شغله وماشي تمـــام

يفتح دكانته سبعة تمـــــــام

راضي ربه صلاة وصيـــام

راضي اهله خير وســـــــلام

راضي زباينه ادب وعـــــلام

شلة ســـوء اتلمت عالغلبـــان

سلطهم عليه ابليس الشيطــــان

وقع المسكين في دايرة الادمان

بارت تجارته وقفل الدكـــــان

نهاره نـــــوم وليله سهـــران

خمرة وقمار وسحاب دخان

عـــقـــلك منـــك فيـــن راح

هايم وماشــي كـــــدا ســــواح

فين الايمــــان فين الصــــــلاح

ياريت ترجـــع لسكة الفـــــلاح

عـــالج ادمانــك تـــريح وترتاح

يـــا شمس

يـــا شمــس يا عاليا في السمــــا

يـــامنـــورة ومزودانـــا بالدفـــا

شعـــاك للقمـــر نــــور الـــليــل

وبــــــدل نظــام الكون تبديــــــل

يـــاســـر من اســـرار الحيـــــاة

يـــاقـــدرة مــــن خلــــق الــــلاه

يا قـــــرص ذهب يا منورة الدنيا

يا أغـــــلى شيء ما مسكته ايديا

لشـــروقك في الصبح بهجــــــة

لغتـــروبك في الليل رهبـــــــــــة

مـهما الغيـــــــام كتر وخباكـــــي

نــورك ديما معانا وكمان دفاكــي

تتركيني

لماذا تبتعدي عني وتتركينـــــي

تتركوني لنار شوق تكتوينــــي

تتركيني بسهم الفراق رميتينـي

تتركيني دون وداع لتعذبينــــي

تتركيني وتعلمي انك تدمرينــي

تــركتيني ولن اتركك تقتلينـــي

تــركتيني ولن افجر براكينــــي

تـركتيني ولن اجعلك تحرقينـــي

تـــركتيني ولن اردد اغانيكـــــي

تــركتيني ولن ادعك تنسينـــــــي

سأطلق طائرا اودعتيه في قفصك

ســأطلق طائرا اوقعتيه في حبك

سـأطلق طائرا اغرقتيه في بحرك

سأطلق طائرا اغويتيه في سحرك

سأطلق طائرا تندمين عليه عمرك